Gwamnatin Jihar Kaduna ta kori Malaman makaranta 233 sakamakon gano su da amfani da takardun boge tun loƙacin da aka ɗauke su aiki.
Tijjani Abdullahi, Shugaban harkokin ilimin farko a Jihar ta Kaduna shine ya bayyana haka a yau Alhamis yayin ganawa da manema labaru a garin Kaduna.
Ya bayyana cewa Malaman da aka kora, an kore su ne sakamakon yin amfani da takardun boge.
Ƙudirin na yin binciken ƙwaƙwaf ga Malaman ya fara aiki tun a watan Afrilu na wannan shekarar, wanda ƙungiyar aka bijoro dashi ƙarƙashin umarnin Gwamnatin Ƙaduna domin gyara ɓangaren na ilimi a faɗin Jihar.
A cewarsa, babban muƙasudin yin hakan shine domin a tabbatar cewa duk Malaman da aka ɗauka a matsayin ma’aikata domin koyarwa ya zamanta suna da cancanta tare da sahihan takardun makaranta.
